Hökm gözlənilir
Avqustun 31-də AzadlıqRadiosunun əməkdaşı, araşdırmaçı-jurnalist Xədicə İsmayıl Bakı Ağır Cinayətlər Məhkəməsində son sözlə çıxış edəcək.
O, son sözə hazırlaşmaq üçün bir həftə vaxt istəsə də, hakim bununla razılaşmayıb, həmin müddəti 5 günə endirmişdi.
Xədicə İsmayıl da, vəkilləri də məhkəmədə ittihamları qəbul etməyiblər.
Avqustun 26-da müdafiə nitqi ilə çıxış edən vəkillər jurnalistə irəli sürülən 5 ittihamın sübuta yetirilmədiyini bildiriblər, ittihamı saxta, qərəzli adlandırıblar və Xədicə İsmayıla bəraət verilməsini tələb ediblər.
Dövlət ittihamçısı jurnalistin 9 il azadlıqdan məhrum edilməsini istəyib.
Avqustun 31-də Xədicə İsmayılla bağlı hökm olacağı gözlənir.
Bu arada bir sıra beynəlxalq qurumlar da jurnalistin hakim ailənin biznesini araşdırdığı üçün həbs olunduğunu bildirir və onun azadlığa buraxılmasını tələb edirlər.
Bakı Ağır Cinayətlər Məhkəməsinin qarşısı
Xədicə İsmayılın məhkəməsini izləmək istəyən xeyli sayda siyasətçi, fəal, jurnalist var.
Ancaq məhkəmə işçiləri onları içəri buraxmırlar.
Almaniya, ABŞ və Norveç səfirliklərinin əməkdaşları məhkəmə zalına buraxılsa da, Böyük Britaniya, Fransa səfirliklərinin, Avropa Birliyinin təmsilçiləri çöldə qalıblar.
|
|
|
Sözünü kəsdilər
Hakim Ramella Allahverdiyeva son sözlə çıxış edən jurnalistin sözünü kəsərək mahiyyəti üzrə danışmadığını bildirib. Buna baxmayaraq jurnalist çıxışına davam edib. Amma hakim ona 3 dəfə çıxışın məzmununa görə xəbərdarlıq edib. Sonda isə jurnalistin çıxışın bitirməsinə imkan verməyib.
Hakim jurnalistin çıxışını kəsdikdən sonra hökm üçün müşavirəyə gedib. Onun hökmü sentyabrın 1-i, ya da 2-də elan edəcəyi gözlənir.
«Bu, hakimiyyətin intiharıdır»
«Xədicə İsmayıl həbsi ilə cəmiyyətə nümunə verdi və onun həbsi cəmiyyətin qorxuluğunu götürdü». Milli Şuranın sədri Cəmil Həsənli belə deyir.
Onun fikrincə, Xədicə İsmayıla neçə il iş verilməsinin mənası yoxdur. «Bu məhkəmə intihar üzərində qurulub. Amma mənəvi baxımdan bu, hakimiyyətin intiharıdır. Mənəvi baxımdan Xədicə hakimiyyəti intihara məcbur edə bildi», - söyləyir Cəmil Həsənli.
Məhkəmə binası önündə gözləyənlərdən biri, AXCP sədri Əli Kərimlinin dediyinə görə, hakimiyyət Xədicə İsmayıldan qisas alır.
«O heç bir cinayət törətməyib. O, Azərbaycanda aparıcı araşdırmaçı-jurnalistdir və məhz keyfiyyətli araşdırmalarına görə, hakimiyyətin korrupsiya əməllərini ifşa etdiyinə görə ondan qisas alırlar. Bütünlükdə bu məhkəmə də şoudan başqa bir şey deyil. Məhkəməni qapalı keçirirlər, onu özünü müdafiə etməsinə imkan da vermirlər. Ona görə də bu məhkəmənin hansı qərar çıxarmasından asılı olmayaraq prosesin qurama olduğu Azərbaycan xalqına aydındır. O, xalqın hüquqlarını qoruduğu üçün hakimiyyətin qəzəbinə gəlib», - deyir Əli Kərimli.